Naaalala Ko Lahat ng Una at Huli

Naaalala ko
lahat ng una
at huli

unang halik at
unang pagngiti

unang sambit mo
ng pangalan ko
sa iyong mga labi

unang pagtatagpo
ng ating mga kamay
na tila ba may pangakong
di paghihiwalay

unang pag-aaway
at unang pagbati
unang pagpapatawad
sa unang pagkakamali.


Naaalala ko
lahat ng una
at huli

huling liham
at huling salita
huling lambing
at matatamis na kataga

huling tawanan
huling asaran
huling landas
na ating dinaanan

huling tingin
at huling pagkakatabi
ang pagkikita na
siya na rin palang huli.



Naaalala ko
lahat ng una
at huli

pati ang mga nasa pagitan
mga binuong alaala
at larawan

bawat araw, oras at sandali
na ang isa't-isa
ang ating pinili

bawat init ng iyong mga yakap
kasabay sa pagbuo ng ating mga pangarap

bawat masaya at malungkot na sandali
bawat luha ko na iyong pinawi.


Naaalala ko
lahat ng una, huli at pagitan

ang iyong pagdating,
pagmamahal
at paglisan.



written: 4/20/19 11:46 p.m.